SUMMARIOS IN INTERLINGUA
Hemolyse De Cellulas Transfundite Per Medio Del Technica Injectori (i.e. Impellente)
Es describite le occurrentia de massive hemoglobinuria e hemoglobinemia in un infante de 1 mense de etate durante le transfusion de sanguine per medio del technica a injection (impulsion). Le infante esseva un masculo Rh+ ab un matre Rh-, sed al nascentia ille non requireva un transfusion de excambio. Tamen, in le curso de un mense le nivello de hemoglobina descendeva usque a 7,4 g per 100 ml, e a iste tempore 55 ml de sanguine Rh+ esseva administrate via un vena del scalpo, per medio de firme pression manual, intermittentemente applicate durante un hora. Esseva usate un agulia numero 24 (calibre britannic). Un hora post le transfusion, hemoglobinuria esseva notate. Post duo horas, le hemoglobina del plasma amontava a 400 mg per 100 ml, e le nivello del hemoglobina urinari esseva 835 mg per 100 ml. Detaliate investigationes serologic esseva interprendite. Esseva constatate que le cellulas del donator habeva essite levemente sensibilisate a antiglobulina, sed isto non poteva esser reguardate como un factor sufficiente a explicar le subite e extreme hemolyse. Le argumento se presentava que le hemolyse esseva possibilemente un effecto del technica transfusori usate.
Sanguine esseva obtenite ab duo donatores. Le prime, quarte, septime, e decime die post venesection, specimens amontante a 5 ml esseva ejicite sub mesurate pressiones via agulias de calibre 22 e 24. Un notabile augmento de hemolyse accompaniava un acceleration del fluxo de sanguine e un reduction del calibre del agulia. Le exacte factores que explica le hemolyse mechanic non es clarmente definibile, sed il es ben cognoscite que le fortiate expulsion de sanguine a transverso un agulia pote causar le destruction de erythrocytos.
